​တၢ်​ဒုး​အိၣ်​ထီၣ်​မၤ​လီၤ​တံၢ်​က့ၤ "​စီၤ​ဖိ​သီ​သီ​တၢ်​မၤ​ဂ့ၤ​ဖီၣ်​ဒ့​ၡၢၣ်"

တၢ်​ဒုး​အိၣ်​ထီၣ်​အ​မုၢ်​နံၤ - ​လါ​မး​ၡး ၂၆ ​သီ, ၂၀၂၄, ​တၢ်​ကွဲး​ဘှီ​ဘၣ်​အ​မုၢ်​နံၤ - ​လါ​မး​ၡး ၂၂ ​သီ, ၂၀၂၅, ​ပာ်​လီၤ​လၢ​လီ​မဲာ်​သၣ်​အ​ပူၤ (​လါ​မ့ၤ ၁ ​သီ, ၂၀၂၆)

Creation Date: March 26, 2024, Revised Date: 03/22/2025, Online Post Date: May 01, 2026

ဘၣ်​မ​နုၤ​အ​ဃိ​လၢ ​စီၤ​ဖိ​သီ​သီ​တၢ်​မၤ​ဂ့ၤ​ဖီၣ်​ဒ့​ၡၢၣ် ​တၢ်​ဒုး​အိၣ်​ထီၣ်​အီၤ​န့ၣ် ​တၢ်​ဂ့ၢ်​အိၣ်​ဝဲ​ဒၣ်​သၢ​ထံၣ်​န့ၣ်​လီၤ. ​ဆၢ​က​တီၢ်​တၢ်​အိၣ်​သး​ခဲ​အံၤ ​ပ​ပှၤ​က​လုာ်​ထံ​ဖိ​ကီၢ်​ဖိ​က​မျၢၢ်​တ​ဖၣ် ​ဘၣ်​ကွၢ်​ဆၢၣ်​မဲာ်​တၢ်​နး​မး, ​တ​နီၤ​ဘၣ်​ပာ်​တ့ၢ်​ကွံာ်​အ​ဟံၣ်​အ​ဃီ ​ဒီး​ဘၣ်​ဃ့ၢ်​ပူၤ​ဖျဲး​လၢ​အ​သး​သ​မူ​အ​ဂီၢ်​န့ၣ်​လီၤ. ​ပ​ပှၤ​က​လုာ်​လၢ ​အိၣ်​ဆိး​လၢ​ဘၣ်​ကီ​ဘၣ်​ခဲ​ဒဲ​က​ဝီၤ​ပူၤ​တ​ဖၣ်​စ့ၢ်​ကီး ​ဘၣ်​ကွၢ်ဆၢၣ်​မဲာ်​ဒီး​တၢ်​ဃံး​တၢ်​စ့ၤ​တ​ဖၣ်​တ​ဖၣ်​အါ​မး​န့ၣ်​လီၤ. ​လၢ​တၢ်​န့ၣ်​အ​ဃိ ​လၢ​ကူၣ်​သ့​ဂ့ၢ်​ဝီ, ​ဆူၣ်​​ချ့​ဂ့ၢ်​ဝီ,​ဒီး​ပှၤ​တ​ဝၢ​​ဂ့ၢ်​ဝီအ​ဂၤ​တ​ဖၣ် ​တၢ်​မၤ​စၢၤ​လိၣ်​ဝဲ​အ​က​လုာ်​က​လုာ်​လီၤ. ​ပ​ဝဲ​လၢ​ပ​အိၣ်​ဆိး​လၢ​ထံ​ကီၢ်​သၢ​ဘ့ၣ်​တ​ဘ့ၣ်​သ့ၣ်​တ​ဖၣ်​တ​ခီ, ​တ​သ့​ဖဲ​အ​သ့ ​ပ​မၤ​ပှဲၤ​စၢၤ​တၢ်​လိၣ်​ဘၣ်​သ့ၣ်​တ​ဖၣ်​အံၤ​န့ၣ်​လီၤ.

​ယ​နီၢ်​က​စၢ်​ယ​စး​ထီၣ်​မၤ​စၢၤ​တၢ်​လၢ ၂၀၁၇ ​နံၣ်​လံၤ​လံၤ​လံ​န့ၣ်​လီၤ. ​ဘၣ်​ဆၣ်​ယ​တၢ်​မၤ​နီၣ်​မၤ​ဃါ​လီၤ​တံၢ်​မ့ၢ်​ဂ့ၤ​တ​အိၣ်, ​ယ​တ​ဆိ​က​မိၣ်​လၢ​အ​ဂ့ၢ်​အါ​အါ​စ့ၢ်​ကီး​ဘၣ်. ​ဘၣ်​ဆၣ်​ယ​က့ၤ​ကွၢ်​က​ဒါ​က့ၤ, ​ကွၢ်​တ​ရံး​ဒီး​ယ​ထံၣ်​လၢ​ပ​ပှၤ​က​လုာ်​အ​ကျါ ​ဒ်​တၢ်​လိၣ်​ဘၣ်​အိၣ်​ဝဲ​ဒၣ်​အ​သိး, ​ပ​မၤ​ဂ့ၤ​မၤ​စၢၤ​လံ​ဒီး ​ဒ်​သိး​ပ​တၢ်​မၤ​ဂ့ၤ​မၤ​စၢၤ​တ​ဖၣ် ​အ​က​တၢၢ်​သု​တ​ကဲ​တၢ်​က​လီ​က​လီ​တ​ဂ့ၤ​အ​ဂီၢ်, ​အ​လီၢ်​အိၣ်​ဝဲ​ဒၣ်​လၢ​ပ​က​ဘၣ်​အိၣ်​ဒီး​တၢ်​ရဲၣ်​တၢ်​ကျဲၤ​အ​ထီ, ​တၢ်​ရဲၣ်​တၢ်​ကျဲၤ​လၢ​အ​က​မၤ​သ​​ဘျ့ , ​မၤ​လီၤ​မၢ်​ကွံာ်​ပ​ပှၤ​က​လုာ်​အ​တၢ်​ကီ​တၢ်​ခဲ​န့ၣ်​လီၤ. ​ပ​ပှၤ​က​လုာ်​အိၣ်​ဆိး​ဘၣ်​လၢ​က​လုာ်​ဂၤ​အ​ထံ​အ​ကီၢ်​ဒ်​အ​မ့ၢ် ​ကီၢ်​ကၠီၣ်​တဲၣ်, ​တၢ်​ခွဲး​တၢ်​ယာ်​လၢ​က​န့ၢ်​ဖံး​န့ၢ်​မၤ​တ​အိၣ်​လၢ​လၢ​ပှဲၤ​ပှဲၤ, ​အ​တၢ်​ကူၣ်​ဘၣ်​ကူၣ်​သ့​ဒီး​အ​တၢ်​ဖံး​တၢ်​မၤ​အ​လုၢ်​အ​ပှ့ၤ​တ​ဖၣ် ​မ့ၢ်​ဝဲ​တၢ်​တၤ​တၢ်​ဖး​ဒိၣ်​လၢ​တ​နံၤ​ဒီး​တ​နံၤ​အ​ဂီၢ်​တၢ်​အိၣ်​မူ​န့ၣ်​လီၤ. ​ပ​ကီၢ်​သူ​လ့ၤ​ထံ​ကီၢ်​အ​တၢ်​ဂၢၢ်​တၢ်​ကျၢၤ​စ့ၢ်​ကီး ​တ​အိၣ်​ထီၣ်​ဒံး​အ​ဃိ, ​ပ​ပှၤ​က​ညီ​က​လုာ်​ဒီး​အ​တၢ်​ကီ​တၢ်​ခဲ​အံၤ ​မ့ၢ်​ဝဲ​ဒၣ်​တၢ်​လၢ​ပ​က​ဘၣ်​ကွၢ်​ထံ ​ဒီး​ဆိ​က​မိၣ်​အီၤ​လီၤ​တံၢ်​လီၤ​ဆဲး​စ့ၢ်​ကီး​န့ၣ်​လီၤ. ​လၢ​တၢ်​န့ၣ်​အ​ဃိ, ​ခဲ​အံၤ​ယ​စး​ထီၣ်​မၤ​လီၤ​တံၢ်​က့ၤ​စီၤ​ဖိ​သီ​သီ​တၢ်​မၤ​ဂ့ၤ​ဖီၣ်​ဒ့​ၡၢၣ် ​မ့ၢ်​လၢ

၁. ​ဒ်​သိး​ကျိၣ်​စ့​တၢ်​မၤ​နီၣ်​မၤ​ဃါ ​ဒီး​တၢ်​ဂ့ၢ်​တၢ်​ကျိၤ​တ​ဖၣ်​က​အိၣ်​ဖျါ​ဝဲ​လီၤ​တံၢ်​လီၤ​ဆဲး, ​ဒီး​ပှၤ​လၢ​ဘၣ်​မူ​ဘၣ်​ဒါ, ​ဒီး​ပှၤ​လၢ​ခံ​တ​စိၤ ​က​ထံၣ်​ဒီး​သ့ၣ်​ညါ​ဘၣ်​က့ၤ ​တၢ်​မၤ​စၢၤ​သ့ၣ်​တ​ဖၣ် ​ဒီး​အ​ဂ့ၢ်​အ​ကျိၤ​လီၤ​တံၢ်​လီၤ​ဆဲး​န့ၣ်​လီၤ.

၂. ​ဒ်​သိး​ဒီး​ပှၤ​လၢ​အ​မၤ​စၢၤ​တၢ်​မ့ၢ်​ဂ့ၤ, ​ပှၤ​လၢ​ဘၣ်​ကျဲၤ​တၢ်​လၢ​တၢ်​ဘၢၣ်​စၢၤ​မ့ၢ်​ဂ့ၤ, ​ဃုာ်​ဒီး​ပှၤ​လၢ​အ​ဒိး​န့ၢ်​ဘၣ်​တၢ်​မၤ​စၢၤ​မ့ၢ်​ဂ့ၤ ​က​အိၣ်​ဒီး​တၢ်​တီ​တၢ်​တြၢ် ​ဒီး​က​ဒိး​န့ၢ်​တၢ်​သူၣ်​မံ​သး​မုာ်​ကိး​က​ပၤဒဲး​အ​ဂီၢ်​န့ၣ်​လီၤ.

၃. ​စီၤ​ဖိ​သီ​သီ​တၢ်​မၤ​ဂ့ၤ​ဖီၣ်​ဒ့​ၡၢၣ်​အံၤ ​တ​မ့ၢ်​ဝဲ​ဒၣ်​ပှၤ​ထဲ​တ​ဂၤ​အ​တၢ်​မၤ​ဂ့ၤ​မၤ​စၢၤ​တၢ်​ဘၣ်. ​မ့​မ့ၢ်​တ​ခီ ​မ့ၢ်​ဝဲ ​စီၤ​ဖိ​သီ​သီ, ​ဃုာ်​ဒီး​အ​သ​မူ​သ​ကိး, ​ဒီ​ပုၢ်​ဝဲ​မိၢ်​ပၢ်​သ​ရၣ်​သ​မါ, ​ဒီး​ပှၤ​လၢ​အ​အဲၣ်​ဘၣ်, ​သး​အိၣ်​စီၤ​ဖိ​သီ​သီ​အ​တၢ်​ဖံး​တၢ်​မၤ​တ​ဖၣ်​ဒီး ​သး​အိၣ်​ဆီၣ်​ထွဲ​မၤ​စၢၤ​တၢ် ​ခီ​ဖျိ​လၢ ​စီၤ​ဖိ​သီ​သီ ​န့ၣ်​လီၤ. ​ဒီး​တၢ်​သး​အိၣ်​ဆီၣ်​ထွဲ​မၤ​စၢၤ​တ​ဖၣ်​ခဲ​လၢာ်​တၢ်​ကွဲး​ဖျါ​ထီၣ်​က့ၤ​အီၤ​က​သ့, ​မၤ​နီၣ်​မၤ​ဃါ​လီၤ​တံၢ်​လီၤ​ဆဲး​အီၤ​က​န့ၢ်​အ​ဂီၢ် ​စီၤ​ဖိ​သီ​သီ​တၢ်​မၤ​ဂ့ၤ​ဖီၣ်​ဒ့​ၡၢၣ် ​အိၣ်​ဒီး​တၢ်​ရဲၣ်​တၢ်​ကျဲၤ​လၢ ​က​ကွဲး​ပာ်​ဖျါ​ထီၣ် (​တ​နံၣ်​တ​ဘျီ​လံာ်​တၢ်​ပာ်​ဖျါ) ​န့ၣ်​လီၤ.

ခဲ​အံၤ "​စီၤ​ဖိ​သီ​သီ​တၢ်​မၤ​ဂ့ၤ​ဖီၣ်​ဒ့​ၡၢၣ်"​အံၤ ​တၢ်​ပျိာ်​လဲ​က့ၤ​အီၤ​ဆူ ​မံၤ​အ​သီ "​ပှၤ​က​ဟု​က​ယာ် ​အံး​ထွဲ​ကွၢ်​ထွဲ​ကီၢ်​သူ​လ့ၤ ​တၢ်​ဆီၣ်​ထွဲ​မၤ​စၢၤ​ကၠိ​ဖိ​တၢ်​ရဲၣ်​တၢ်​ကျဲၤ" ​လံ​န့ၣ်​လီၤ. ​ဝံ​သး​စူၤ​ကွၢ်​ဖး​ဘၣ်​တၢ်​ဂ့ၢ်​တၢ်​ကျိၤ​အ​လၢ​အ​ပှဲၤ ​ဖဲ ​

"Saw Poe Thaw Thaw's Legacy Foundation Change to Guardian of Kawthoolei Scholarship Program" န့ၣ်​တ​က့ၢ်.

​တၢ်​ဘျုး

​စီၤ​ဖိ​သီ​သီ